你可唔可以每個月儲起三千蚊?

向下

你可唔可以每個月儲起三千蚊?

發表  Admin 于 周四 12月 08, 2011 12:12 am

「你可唔可以每個月儲起三千蚊?」世民認真的問。
「三千蚊?我要畀家用,要還大學貸款,家讀緊個碩士,一年要交幾皮嘢學費,我搵緊萬二蚊一個月,扣咗六嚿水強迫金,仲點儲三千?」八十後的阿俊,有條理地解釋。
「咁你可唔可以當自己俾人減人工,一個月得九千蚊?」
「點解要咁作賤自己?明明搵萬二蚊一個月,點解要當自己搵九千?」阿俊似乎有點不明白。
「咁點解你哋又堅持要買樓上車?租唔得咩?你知唔知,做業主,差餉管理費加利息支出,最平都要三千蚊一個月,你連呢筆都負擔唔起,政府幫你上車又有乜意思?」世民終於入正題。
「但係,上車係每個香港人嘅夢想,點解我哋唔可以有夢想?」阿俊在點不忿。
「你可以有夢想。不過,你都要有能力去實現自己嘅夢想。要政府幫你哋上車,問題係你哋有無能力,將架車開到終點。半路中途跪低,唔通你又要人去救你?」
「不過,我今日唔上車,第日啲樓仲貴,我點追喎?家連元朗都賣緊六千蚊呎。」
「九七金融風暴,你仲讀緊小學,你唔知道以前樓市有幾瘋狂,我唔怪你。嗰陣時,人人都識得鬧,一般人負擔唔起供樓,不過呢,政府仲係有政策要五成人居住自置物業。我識得好多人,買咗嗰期居屋,到家都未有耐返家鄉。」

不儲錢 偏要硬上車
「我哋後生仔,只係想買層樓自住,升跌唔緊要囉。」阿俊就是有九十後的清高。
「當然啦。不過,你又知唔知,當年有幾多人,無咗份工,層樓又負資產?家要你每個月儲三千蚊,都牙痛咁聲,你點供樓呀?」
「儲三千蚊又有乜用?幾時先買到幾百萬一層樓啊?」
「一個月儲三千蚊,一年有三萬幾,如果你同女朋友一齊儲,四、五年兩個人加起,都有廿幾萬啦,做九成按揭,響九龍都買到四、五百呎,夠你哋二人世界啦。到時,你哋都只不過廿六、七歲之嘛。」
「每個月儲錢,我真係無信心喎。」阿俊開始面對現實。「咁你憑乜去供樓?」

Admin
Admin

文章數 : 8
注冊日期 : 2011-12-04

檢視會員個人資料 http://think.24d24.com

回頂端 向下

回頂端


 
這個論壇的權限:
無法 在這個版面回復文章